Денеска, ќе се одржи првиот промотивен настан на заедничката кампања на Европската Унија и Советот на Европа, „Блокирај ја омразата. Сподели љубов!“, која се фокусира на борбата против говор на омраза.
Настанот ќе биде посветен на младите и ќе се одржи во дворот на средното училиште „Јосип Броз Тито“ од 12 до 14 часот.
На настанот ќе присуствуваат млади, кои заедно со познатиот уметник Дејан Давчевски, ќе нацртаат мурал на ѕидот на средното училиште, преку кој ќе ја испратат главната порака на кампањата и ќе ги повикаат сите млади да се обединат против омразата и дискриминацијата во нашето општество. За забавата да биде целосна, ќе се погрижи познатиот диџеј Васе, а ќе присуствуваат и дел од амбасадорите против говор на омраза, како и младите европски амбасадори.
Кампањата „Блокирај ја омразата. Сподели љубов!“ има цел да ја подигне свеста за различните форми на говор на омраза, кои таргетираат специфични заедници и поединци во македонското општество, како и да промовира разни начини за спротиставување на говорот на омраза. Кампањата вклучува јавни личности, институции, организации и клучни активисти за човекови права, кои преку лични сведоштва, приказни и размена на добри практики ќе промовираат разноликост и еднаквост во локалните заедници и во регионот.
Текстот „Блокирај ја омразата. Сподели љубов!“ – улична уметност и музика на отворено денеска во Скопје е превземен од МАКФАКС.
