Скопје, 26 март 2020 (МИА) – Роковите за полагање на државната матура може да ги поместиме во јули наместо во јуни. Тоа е предлог на Државниот испитен центар, но засега не сум одлучил да правиме измени и дополнување во календарот зашто не знаеме колку ќе трае оваа состојба. Во зависност од околностите, ќе преземеме чекори, изјави министерот за образование и наука Арбер Адеми претпладнево во гостување во емисија на Канал 5.
-Во нормални, редовни околности, требаше да се организира во јуни, но тие рокови ние може да ги поместиме во јули. Дај боже час поскоро да заврши оваа состојба со која се соочуваме сега, но нема простор за загриженост зашто ние можеме да направиме измена и дополнување на калнедарот на организирање на учебната година за сите јавни средни училишта. Така ќе се дефинира и кристализира датумот за државната матура. Ако не во јуни, ќе биде во јули. Веќе имам таков конкретен предлог од Државниот испитен центар, рече Адеми во контактна ТВ-емисија во која заинтересирани гледачи му поставуваат прашања.
Нагласи дека нема простор за загриженост ниту за уписите на факултет, за кои услов е положената државна матура, затоа што и ако се организира испитот во јули, матурантите ќе ги стигнат редовните рокови за запишување на високообразовните установи на крајот на август и на почетокот на септември кога, исто така, има уште два (втор и трет) уписен рок.
Адеми нагласи дека состојбата ја следат, засега е сè во согласност со роковите, и поради тоа во однос на полагањето на државната матура не предвиделе нешто конкретно во уредбата за средно образование што Владата ја усвои пред три дена на седница.
Исто така, рече Адеми, нема простор за паника ниту за уписите во средното образвание. Ќе се почитува законскиот рок (31 март) за објавување на Конкурсот, но самите уписи, според роковите, се реализираат на крајот на јуни, а ако има потреба тие може и дополнително да се коригираат. хс/скс/
