Возењето на кратки растојанија во зима, особено на ниски температури, е најмалку економично, бидејќи тогаш автомобилот троши најмногу гориво — моторот едноставно нема доволно време да се загрее. Во просек, при температура од –7 степени, потрошувачката на гориво е повисока за околу 12 отсто во споредба со пролетните или летните услови на 25 степени.
Постојат повеќе причини за ваквото зголемување. Моторот има потреба од време да ја достигне оптималната работна температура. Студеното време, пак, го намалува притисокот во гумите, што го зголемува отпорот при тркалање и доведува до поголема потрошувачка на гориво — затоа се препорачува редовна проверка на притисокот.
Дополнително, студениот воздух е погуст од топлиот, па затоа отпорот при движење расте, исто како и потрошувачката. Во услови на снег и мраз, зголеменото лизгање на погонските тркала исто така влијае на зголемена употреба на гориво. Дури и побавното возење до околу 60 км/ч може негативно да влијае на економичноста, пишува „Ревија ХАК“.
Стручњаците даваат и дополнителни совети:
Не ги користете предолго функциите за одмрзнување и одмаглување на стаклата, ниту пак греењето на седиштата, бидејќи тие дополнително ја оптоваруваат батеријата и моторот.
Паркирањето во потопли места, како гаражи, може да помогне да се намали загубата на температура. Исто така, по стартувањето на моторот, најдобро е да почнете да возите што е можно побрзо — така моторот се загрева побрзо и поекономично.
