Движењето „За Наша Македонија“ (ЗНАМ) ќе настапи самостојно со советнички листи во повеќе од 50 општини, но ќе коалицира со ВМРО-ДПМНЕ за поддршка на кандидатите за градоначалници на претстојните локални избори.
Како први кандидати за градоначалници од редовите на ЗНАМ се потврдени лидерот на партијата и актуелен градоначалник на Куманово, Максим Димитриевски, и Мирослав Лабудовиќ за Општина Центар.
„Централниот одбор ја усвои одлуката за взаемна соработка и поддршка со ВМРО-ДПМНЕ во делот на кандидатите за градоначалници. Тоа значи дека ВМРО-ДПМНЕ ќе ги поддржи кандидатите на ЗНАМ и во тие општини нема да има свој кандидат, а од друга страна, ЗНАМ ќе ги поддржи кандидатите за градоначалници на ВМРО-ДПМНЕ во сите општини, вклучувајќи го и Градот Скопје“, изјави портпаролот Никола Мемов.
Мемов нагласи дека засега се утврдени само двајца кандидати за градоначалници – за Куманово и за Центар – бидејќи партијата пристапува „релаксирано“ и не сака да кандидира по секоја цена. Сепак, останува отворена можноста ЗНАМ да предложи кандидати и во други општини.
Фокусот на движењето, како што рече Мемов, е ставен на формирање силни советнички листи, со кои преку локалната самоуправа ќе покажат дека управувањето може да биде чесно, одговорно и со визија.
