Жителите на општина Аеродром најавија дека повторно ќе излезат на протест денеска во 18 часот, на истото место – паркчето кај Авионче во Ново Лисиче. Тие велат дека ќе се собираат секој ден сè додека не видат конкретни мерки за решавање на проблемот со загадувањето од депонијата Вардариште.
„Сите што сме најмалку една година во општина Аеродром добро го знаеме жариштето на проблемот со загадениот воздух, а тоа е Вардариште“, изјави еден од граѓаните, кој потсети дека денеска жителите се обидоа да ја блокираат раскрсницата меѓу булеварите „АСНОМ“ и „Србија“ како знак на револт.
Протестите, според организаторите, ќе продолжат сè додека институциите не ги исполнат ветувањата и не се преземат конкретни чекори за трајно решавање на долгогодишниот еколошки проблем.
