Земјоделците од Полошкиот Регион да внимаваат да не палат отпадоци на отворен простор или на стрништа, кои бргу може да се прошират, предупреди СВР Тетово. За оние што нема да ги почитуваат предупредувањата, ќе следуваат затворски казни.
„Во полн ек се сеидбени и други земјоделски активности поради што веќе се чувствува зголемена раздвиженост на нивите, на кои интензивно се работи, особено за викендите. Оттаму, Секторот за внатрешни работи Тетово апелира до земјоделците, но и до сите други граѓани, да бидат постојано внимателни ако се движат или работат во полето и особено да не палат отпадоци на отворен простор или на стрништа, кои бргу можат да се прошират, особено ако времето е ветровито.
Во спротивно ќе се соочат со ригорозни законски санкции, односно со соодветни поднесоци и ќе им бидат заканувачки затворски казни од 6 месеци до 5, односно до 8 години, зависно од видот на пожарот, околностите во кои се случил и крајните последици“ предупредува СВР Тетово.
Секторот за внатрешни работи Тетово презема координирани превентивни и други мерки навреме да се пресретнат можните причини за пожари, а во наредниот период ќе бидат засилени и планираните контролни активности на поширокото подрачје.
