Украинскиот претседател Володимир Зеленски синоќа најави дека очекува овој и следниот месец да бидат потпишани низа нови одбранбени пакети од Западот за Украина. Подготвуваме нови договори со партнерите порача Зеленски во видео обраќање. -Јануари и февруари треба да донесат соодветни резултати. Веќе има одредени датуми кога може да се очекуваат нови и моќни документи, изјави тој. Откако Русија ја започна својата инвазија на Украина во февруари 2022 година, западните сојузници на Киев се обединија во обезбедувањето невидена воена и друга помош за да им помогнат на Украинците да ја одбранат својата земја. Но, со оглед на тоа што војната најверојатно ќе влезе во третата година наскоро, малите промени на линијата на фронтот во изминатите 12 месеци, и зголеменото противење во Соединетите Држави за новите пакети за воена помош за Украина, средствата и опремата пристигнуваат бавно и доцна. Зеленски не ги именуваше земјите со кои треба да ги финализира договорите. Украинскиот претседател помина неколку недели во меѓународна дипломатска мисија обидувајќи се да обезбеди поголема политичка и воена поддршка. Тој често повторуваше дека засилените зимски воздушни напади на Русија и бавната, но исцрпувачка офанзива на Москва во источна Украина ја нагласуваат потребата од зајакнување на воздушната и копнената одбрана на Киев. Велика Британија, еден од најверните поддржувачи на Киев, веќе најави дека ќе ја зголеми својата поддршка за Украина во следната финансиска година на 2,5 милијарди фунти (2,91 милијарди евра). Францускиот претседател Емануел Макрон во вторникот изјави дека ќе отпатува во Украина во февруари за да го финализира билатералниот договор за безбедносни гаранции, според кој Париз ќе испорача понапредно оружје, вклучително и крстаречки ракети со долг дострел.
Зеленски најави нова воена помош за Украина од Западот
