Украинскиот претседател Володимир Зеленски потпиша два закона за продолжување на вонредната состојба и на општата мобилизација за уште 90 дена.
Двете мерки беа продолжени до 15 ноември. Зеленски првпат прогласи вонредна состојба и општа мобилизација на 24 февруари 2022 година кога Русија ја почна својата целосна инвазија на Украина. Оттогаш и двете мерки беа неколкупати продолжени.
Според вонредната состојба, Украинците на возраст меѓу 18 и 60 години, со некои исклучоци, не смее да ја напуштат земјата бидејќи би можеле да бидат повикани на воена служба.
Зеленски денеска одржа и состанок за снабдување и производство на оружје за тактичките и стратешките планови на Русија, како и за подготовката на украинскиот систем за воздушна одбрана и енергија за претстојната зима.
Зеленски во својата објава на „Телеграм“ додаде дека Киев подготвува нови чекори за да обезбеди континуирана работа на привремениот коридор на Црното Море, кој беше лансиран за да се овозможи премин на бродови откако Русија еднострано го раскина договорот за жито со посредство на ОН.
Првиот цивилен брод исплови од украинското пристаниште Одеса преку хуманитарниот коридор на 16 август.
