Вицепремиерот Фатмир Битиќи ја префрли топката во Собранието, кога беше прашан за платите на вработените во УЈП и Царина. Новинарите го потсетија дека функционерите веднаш си ги покачија платите по одлуката на Уставен суд, а не ја спроведуваат законската обврска за покачувањето на платите на вработените во овие две институции.
Битиќи на забелешката, дека државата не го почитува законот, рече: „…Постои механизам на автентично толкување во Собрание. Ако Собрание ни потврди дека да и УЈП и Царина треба да добијат покачување на плата како другите вработени во Финансии – немам никаков проблем да изгласаме таква одлука на Влада за повисоки плати“.
Според вицепремиерот Фатмир Битиќи нема да дојде до блокада на институциите во државата, поради штрајкот на вработените во УЈП, бидејќи, како што рече тие се во преговори со синдикатите, како и дека имаат помирувач во процесот.
„Предлози се даваат на маса, по медиуми можеме се да си кажуваме, ние знаеме што имаме добиено. Имаме добиено предлог од нив дека методологијата за плати треба да биде заснована на просечна плата помножено со коефицинет, ние кажавме дека тоа е прифатливо за владата, како што е и постоечката методологија која се аплицира во државата. Двата модела треба да се разговараат на маса и секако таму да се бара решение. Предложивме преоден период од пет години, тие рекоа не, сега го кратиме на 2,5 години“ објасни Битиќи.
Тој додаде дека тоа се делови од новиот предлог што ќе биде пуштен до синдикатите и тврди дека со тој модел сите вработени во јавниот сектор ќе добијат достоинствени плати.
