Српскиот претседател Александар Вучиќ изрази сочувство за смртта на фудбалскиот ас, Синиша Михајловиќ.
„Бев исклучително погоден од веста за смртта на Синиша Михајловиќ, легенда на нашиот и европски фудбал и патриот кој со сите сили ја сакаше Србија.
Начинот на кој го разбираше и играше фудбал, во кој го ткаеше целиот свој живот како играч и тренер, ќе остане запаметен по неговиот уникатен талент и темперамент. Печатот на Миха во спортот е обоен од страста што ја остави на теренот, како и од искрената емоција што никогаш не ја криеше кога победуваше или кога губеше. Играта и борбеноста со која ја подигна „Ѕвезда“ на светскиот врв, одбележувајќи дел од најблескавата историја на овој тим и српскиот фудбал, одамна се влезени во аналите на фудбалот.
Малку се зборовите кои би можеле да ги опишат неговите маестрални подвизи на теренот, а сите се сеќаваме на нив, како и на извонредните голови со кои предизвикуваше ентузијазам и кои секогаш гордо и искрено ги посветуваше на својот тим, семејството и земјата, исто како што тој играше. Така се справи со страшната болест – борбено и со крената глава, со нескротлив дух, каков што имаше на теренот.
Тој беше врвен спортист кој го почитуваа и соиграчите и противниците, а стилот на игра на Миха ќе остане трајна инспирација и пример за генерации млади фудбалери. Изразувам длабоко сочувство до семејството, пријателите и обожавателите на Синиша Михајловиќ. Нека почива во мир“ – напиша Вучиќ на Инстаграм.
View this post on Instagram
