Најмалку 89 лица се уште се водат како исчезнати по смртоносните поплави што го погодија југоисточниот дел на Шпанија.
Како што соопштија од регионалната судска власт во Валенсија, во бројката се вклучени само оние чие исчезнување го пријавиле членовите на семејството. Семејствата дадоа лични податоци и биолошки примероци за да се овозможи идентификација на исчезнатите.
-Се уште има исчезнати лица кои треба да се најдат, изјави премиерот Педро Санчез на прес-конференција во Мадрид.
Пред седум дена по обилните дождови се излеаја реки, а поројот однесе најмалку 217 животи. Форензичарите досега идентификувале 133 лица.
-Уништени се домови и деловни објекти, затрупани под кал, а се уште има многу луѓе без потребната храна. Мора да продолжиме да работиме, изјави Санчез.=
Тој додаде дека Владата ќе одвои 10,6 милијарди евра за помош на настраданите.
Метеоролошката служба АЕМЕТ вчера објави дека „во наредните денови ќе се зголеми нестабилноста во медитеранската област и на Пиринеите“.
-Очекуваме обилни врнежи на Балеарските Острови, Каталонија и провинцијата Валенсија. Но, нема да има ни приближно толку дожд како што беше минатата недела, објави АЕМЕТ преку социјалната мрежа „Х“.
