Претседателот на Јужна Кореја и премиерите на Кина и Јапонија, Џун Сок-Јол, Ли Кианг и Фумио Кишида денеска ќе се сретнат во Сеул на дводневен самит за да го продолжат трилатералниот дијалог за прв пат од 2019 година.
Како што јави агенцијата Јонхап, Џун подоцна во текот на денот во претседателската палата ќе има билатерални разговори со кинескиот и јапонскиот премиер, каде во понеделник ќе се одржи и трилатерална средба на лидерите.
Ова е прв ваков самит меѓу Јужна Кореја, Јапонија и Кина од декември 2019 година, по пауза поради пандемијата „Ковид-19“ и затегнатите односи меѓу Сеул и Токио поради историски спорови.
За време на билатералната средба со Ли, кој ја прави својата прва посета на Јужна Кореја по преземањето на функцијата во март 2023 година, Џун се очекува да разговара за начините за подобрување на стратешката комуникација и проширување на економската соработка и трговија, како и безбедносни прашања.
Кишида и Џун ќе разменат мислења за начините за продлабочување на практичната соработка на различни полиња и зајакнување на трилатералната соработка со САД за одвраќање на заканите на Северна Кореја, според Јонхап, пренесе Танјуг.
Во понеделник тројцата лидери ќе разговараат за соработката во шест области – економија и трговија, одржлив развој, здравствени прашања, наука и технологија, управување со катастрофи и безбедност и културна размена. Планирано е и усвојување на заедничка изјава, наведува јужнокорејската агенција.
