Повеќе од 180 мигранти влегле во Полска преку тунел скриен во шумата на границата со Белорусија, соопшти граничната полиција во петокот.
Околу 130 од нив беа приведени во Полска откако преминот беше откриен во четврток, но останатите сè уште се во бегство, соопшти полската гранична стража, пренесува Ројтерс .
Тие објавија видео од тунел ископан низ корени и гола земја. Тунелот е потпрен на дрвени греди и метални прачки и е висок само 1,5 метри – недоволно за повеќето луѓе да поминат низ него без да се наведнуваат.
Полска, членка на Европската Унија, се соочува со мигрантска криза на границата со Белорусија од 2021 година.
Таа ги обвини Белорусија и Москва, сојузник на Минск, дека се обидуваат да ја дестабилизираат Полска со охрабрување на луѓе, претежно од Блискиот Исток и Африка, да ја преминат границата.
Белорусија и Русија постојано ги отфрлаат овие обвинувања.
Граничната стража соопшти дека ова е четвртиот тунел откриен оваа година во западниот регион Подлаские.
