Седумнаесет лица загинаа, а 29 се повредени во судир на автобус и камион на пустински автопат во Египет, соопшти денеска Министерството за здравство на земјата.
Несреќата се случила во средата на околу 400 километри југозападно од Каиро, во провинцијата Њу Вали, а на местото на несреќата биле испратени 26 возила на брза помош за да ги пренесат повредените во болниците, се вели во соопштението на Министерството за здравство, пренесе Ројтерс.
Не е соопштено како дошло до несреќата. Сепак, како што потсетува британската агенција, несовесното возење, лошите сообраќајни правила и лошите услови на патиштата се причина за голем број несреќи во Египет.
Во сообраќајни несреќи во таа земја во 2021 година загинале 7.101 лице, што е зголемување за 15,2 отсто во однос на 2020 година, објави статистичката агенција КАПМАС во минатогодишниот извештај.
