Во четврток православните верници го одбележуваат празникот Воведение во храмот на Пресвета Богородица, во народот познат и како Пречиста. Празникот, кој се слави на 4 декември, е еден од најзначајните во православната традиција.
Според црковното предание, овој ден го бележи моментот кога Пресвета Богородица, придружувана од своите родители Јоаким и Ана, за првпат стапила во храмот во Ерусалим. Според Евангелијата, родителите дале завет дека ако добијат дете, ќе го посветат во служба на Бога. Кога Марија наполнила три години, тие ја одвеле во храмот.
Пред храмот имало 15 скали. Јоаким и Ана ја поставиле Марија на првата скала, а таа сама се искачила до врвот, каде што ја пречекал првосвештеникот Захарија, таткото на свети Јован Крстител. Тој ја вовел не само во храмот, туку и во Светињата над светиите — просторија во која никој не влегувал освен поглаварот на свештенството, и тоа само еднаш годишно.
По принесувањето жртва и добиениот благослов, Јоаким и Ана се вратиле дома, а Марија останала да служи во храмот цели девет години. По смртта на родителите, таа сакала да продолжи да живее девствено во храмот, но поради тогашните закони, на 12-годишна возраст била доверена на свети Јосиф како свршеница — за да остане во девственост, но и формално да го исполни законот. Марија се смета за првата девојка што дала доживотен завет, а нејзиниот пример подоцна го следеле илјадници вернички.
Бидејќи празникот се паѓа во рамки на Божиќниот пост, според црковниот устав се дозволува консумирање риба и масло. Празникот традиционално има посебно значење за жените. Во минатото постоело верување дека оние кои долго време не можат да добијат потомство треба да се помолат и да преноќат во црква за Бог да им ја исполни желбата.
