Во несреќа при мотоциклистичка трка во Брно, Чешка, животот го загуби познатиот македонски бизнисмен Душко Чифлиганец, заменик претседател на „Адора бизнис групација“ од Скопје и директор на Adora Living Solutions, објави Локално.мк
Според информациите, Душко Чифлиганец при мото-трка паднал од моторот и со тешки телесни повреди веднаш бил пренесен в болница. Посебно тешки повреди добил на главата. И покрај напорите на лекарите, тој починал.
Душко Чифлиганец беше пасиониран учесник во брзинскиот мотоциклизам, адреналински спорт со кој се занимава од мали нозе а во последните две години се вклучи и во меѓународните натпреварувања.
Тој беше познат и како активен учесник во хуманите активности на групацијата, која своите дејности од оваа област ги спроведува и во Србија, преку заедничка хумана мисија со Фондацијата Новак Ѓоковиќ.
