Министерството за здравство од назначувањето на министерот Азир Алиу, на 9 јуни, почна интензивен процес на засилување на кадарот во јавните здравствени установи низ целата држава. Како што соопшти денеска, за нешто повеќе од еден месец се реализирани или се во завршна фаза над 950 вработувања од различни здравствени профили: доктори по медицина, медицински сестри, лаборанти, болничари, техничари, психолог, социјални работници, хигиеничари и друг неопходен персонал.
Според Министерството, процесот продолжува и во наредните денови ќе бидат отворени нови постапки за вработување во повеќе јавни здравствени установи во државата.
-Професионалниот развој и зајакнувањето на човечките ресурси претставуваат клучен дел од новиот пристап во здравствениот систем, најавен од министерот за здравство, Азир Алиу. Здравството не може да функционира без луѓето што секојдневно се грижат за неговото непречено работење. Министерството за здравство останува посветено на градење стабилен и функционален здравствен систем којшто започнува со вложување во луѓето, кои се негова основа, наведува Министерството.
