Предлогот за разрешување на државниот јавен обвинител Љупчо Коцевски утре ќе биде разгледан на владина седница, по што ќе биде доставен до Советот на јавни обвинители, информираат од Владата на Република Северна Македонија.
„На утрешната владина седница ќе се разгледа мислењето доставено од Министерството за правда, по што, согласно законските обврски, тоа ќе се достави до Советот на јавни обвинители. Како влада ќе продолжиме да преземаме активности кои се во насока на подобрување на функционирањето на правосудниот систем. Довербата на граѓаните е сериозно нарушена и затоа сме силно посветени конечно да владее правото и да имаме правна држава“, стои во соопштението на Владата.Причини за разрешувањето: скандали, судир на интереси и корупција
Министерството за правда, постапувајќи по заклучокот од 50-та седница на Владата, одржана на 11 февруари, подготви мислење за разрешување на државниот јавен обвинител и го достави до Владата за натамошно процесуирање.
Во соопштението од Министерството се наведува дека во изминатиот период Јавното обвинителство било предмет на низа скандали, нарушена функционалност, незаконски постапувања, корупција и неефикасност во кривичното гонење.
„Државниот јавен обвинител постапувал во предмети во кои постоеле околности кои предизвикуваат сомнеж во неговата непристрасност, како и судир на интереси, а за кои тој требало да знае и да се изземе“, велат од Министерството за правда.Владата го обвинува Коцевски за незаконски одлуки
Од Владата тврдат дека разочараноста од постапувањето на Коцевски надвор од законските надлежности довела до нарушување на довербата во правниот систем.
„Разочараноста на Владата од постапувањето надвор од законските надлежности, разочараноста на граѓаните од системот кој не функционира и секојдневното продолжување со ваквите состојби резултира со нефункционирање на правната држава“, изјави на прес-конференција портпаролката на Владата, Марија Митева.Како една од причините за разрешување, Владата го посочува и незаконското именување на вршител на должност на Вишото јавно обвинителство на местото на суспендираниот Мустафа Хајрлухаи.
Коцевски ги демантира обвинувањата
Републичкиот обвинител Љупчо Коцевски ги негира тврдењата дека постапил незаконски.
„Јас го следев законот и роковите во него“, изјави Коцевски, демантирајќи дека именувањето на вршителот на должност било спротивно на законските прописи.Иако неговиот мандат трае шест години, Владата настојува тој да биде предвреме прекинат, што дополнително ја заострува тензијата околу овој случај.
