Повеќе од 50 лица се хоспитализирани во Ниш и Пирот со симптоми на труење со амонијак, откако товарен воз што го превезувал овој гас излета од шините кај Пирот.
Седум лица се згрижени во Универзитетскиот клинички центар во Ниш, соопштија од установата, пренесе „Би-би-си“ на српски јазик.
„На одделението за реанимација има четворица пациенти, а на токсикологија двајца пациенти. Сите се со стабилни витални параметри со надразнувачки симптоми и благи хемиски изгореници. Сите пациенти се наши државјани“, велат од Универзитетската болница Ниш, пренесува Бета.
Полицијата апелира до луѓето кои живеат во близина да не излегуваат од домовите.
При превртување на вагонот почнало да тече плин, што довело до висока концентрација во атмосферата, соопшти МВР.
Во Пирот е прогласена вонредна состојба, а училиштата нема да работат во понеделник на 26 декември, пишува локалниот Јужне вести.
Како што е соопштено, градоначалникот на Пирот, Владан Васиќ објаснил дека вонредната состојба е прогласена во моментот кога над Пирот се издигнал облак од амонијак поради ветерот што дувал во правец на тој град и Димитровград.
Тој рече дека 20 вагони се полни со амонијак и дека „еден или два“ се лизнале и истекувале гас.
„На терен е екипа која може да го поправи истекувањето и чекаме информации. Засега главна препорака е луѓето да не излегуваат од дома, да не користат клима уреди, да не внесуваат надворешен воздух и да не отвораат прозорци. Чекаме времето да си го направи своето, амонијакот да помине над Пирот“, рече Васиќ.
Градоначалникот на Пирот додаде и дека цистерна се лизнала во Нишава и очекува последици по флората и фауната.
Реакцијата на амонијакот со вода создава густ чад, па во моментот е тешко да се пристапи до локацијата.
„Полицијата и пожарникарите брзо реагираа, контактираме со големи компании, нема да работат училиштето и некои институции“, вели Васиќ.
Градскиот штаб за вонредни состојби издал упатство до граѓаните како да се однесуваат во ситуации на истекување на амонијак и формирање на облак од амонијак, пишува Јужни вести.
„Ако токсичниот облак е многу блиску, не го напуштајте станот, туку преземете мерки да го запечатите, затворете ги прозорците и вратите, намалете го движењето низ станот на минимум, подгответе маски со тампони од газа или други ткаенини“.
Додаваат дека водата за пиење од отворени локации и јавни чешми не се користи со оглед на тоа што облакот од амонијак лесно се раствора во вода, па постои можност на овој начин да се внесе амонијак во организмот.
Во радиус од четири километри е затворен пристапот до местото каде возот излета од шините.
Железничкиот сообраќај е во прекин, а поради слаба видливост и димна завеса, во прекин е и патниот сообраќај меѓу Пирот и Бела Паланка на магистралниот и главниот пат.
Поради слаба видливост на тој дел од автопатот се судриле неколку возила.
