Тоа што нема протести пред Собранието, за ДУИ е потврда дека граѓаните даваат поддршка на процесот за уставни измени. Пратеникот од оваа партија, Арбер Адеми, посочи дека ова е показател дека граѓаните не сакаат конфликти туку мир. Според него, денеска паѓаат маските и пратениците ќе го покажат вистинското лице.
„Да погледнеме како изгледа булеварот ‘11 октомври’, пред Собранието, каде што сме ние. Денешната слика пред булеварот е показател дека граѓаните се за европска иднина. Денешната слика се потврда дека граѓаните не сакаат поделби туку сплотување за ЕУ. Граѓаните не сакаат конфликти туку сакаат мир. Дека не сакаат да бидат со Русија и истокот туку со Америка и Европа. И таа слика покажува и докажува дека граѓаните се за ЕУ, подобар животен стандард, за интеграција, а не за изолација, непредвидливост. Сликата на булеварот е најголем пораз на илозациските сили кои ја тероризираат јавноста со непостоечки и измислени стравови. Стравови од Албанци, Срби, Грци, Бугари. Граѓаните си седат спокојно дома за да ја донесеме последната и најважна одлука за државата“, кажа Адеми.
Според него, во Собранието се решава второ најголемо прашање по зачленувањето на Македонија во НАТО.
„Убеден сум дека секој од вас посакува добро на државата“, додаде тој.
Предлогот за уставни измени е израз на дипломатска работа и компромис, според Адеми. Го нарече и билет во еден правец за во ЕУ.
