Тројца повредени има во сообраќајната несреќа што се случи вчера во скопски Бутел, на крстосницата на булеварите Христијан Тодоровски Карпош и Босна и Херцеговина. Од МВР за „Макфакс“ посочуваат дека „голфот“, кој го разнесе возилото „клио“, го управувал 20-годишен скопјанец. Возилото кое стоело на семафорите во моментот кога „голфот“ со голема брзина удрил во него го управувал 49-годишен скопјанец.
„Во незгодата телесни повреди добиле двајцата возачи и уште еден сопатник од возилото ‘фолксваген голф’ Џ. Х. (26) од с. Страчинци, констатирани во комплексот клиники ‘Мајка Тереза’ и Градската општа болница ‘Св. Наум Охридски’. Извршен бил увид од екипа на СВР Скопје“, велат од МВР.
„Макфакс“ веќе објави дека возачот на автомобилот „клио“ додека стоел на црвено светло во својот автомобил, зад него се појавило возило кое залетано со голема брзина го удрило и целосно го згмечило задниот дел извртувајќи го за 360 степени. Очевидци за „Макфакс“ раскажаа дека возачот што ја предизвикал сообраќајната несреќа возел со неверојатна брзина.
