Министерот за надворешни работи Бујар Османи изјави дека работат на две патеки. На едната преговараат со ВМРО-ДПМНЕ во целина, а на другата се разговори со пратениците поединечно. Како што додаде, рок за договор има додека да дојде моментот за прво гласање во парламентот.
„Работиме на две паралелни патеки – со опозицијата во целина и се разбира со пратениците во Собранието како се отвора јавната дебата таму. До денот кога на пленарна седница ќе го има првото гласање отворени се опциите да има договор со опозицијата по однос на уставните измени вклучувајќи го и планот од три точки што го претставив. Јас се надевам дека во наредниот период од Влада до Собранието ќе биде препратен драфтот односно предлогот од страна на Комисијата и тука ќе почнат да се бројат роковите. Знаете дека треба прво Комисија да разгледа, па 10 дена предлогот треба да се седи кај пратениците и така да поминат одредени уставни рокови за да се дојде до првото гласање. До првото гласање имаме шанси за договор со опозицијата“, рече Османи.
Тој очекува од сите партии во германскиот парламент да биде поддржана резолуцијата на Бундестагот, со која ќе се порача дека македонскиот народ и јазик се добредојдени во ЕУ. Сепак, овие резолуции според него се симболична поддршка бидејќи и без нив идентитетот на земјава во ЕУ е загарантиран.
