Градоначалникот на Општина Карпош, заедно со дел од општинските службеници, во текот на вчерашниот ден изврши увид во две станбени згради лоцирани на улица Никола Парапунов. При контролата беше утврдено дека во двата објекта паркинг местата не се изведени во согласност со одобрението за градба издадено од надлежните служби, иако за тоа постојат технички услови.
Според забелешките на општината, висината на гаражниот простор овозможува паркирање на две нивоа, но инвеститорите не го искористиле овој потенцијал.
Во текот на оваа седмица, сопствениците, инвеститорите и надзорот ќе бидат повикани на состанок во Општина Карпош. Од нивниот одговор и подготвеност да го коригираат недостатокот, ќе зависи и кои мерки ќе ги преземе општината во понатамошната постапка.
