Премиерот Димитар Ковачевски кој пред пет дена кажа дека Христијан Мицкоски и Никола Груевски имаат различни ставови за уставните измени, денеска прашан од каде знае каков став има бегалецот и експретседател на ВМРО-ДПМНЕ – тој вели дека не знае. Ковачевски само посочи дека Груевски е активен на социјалните мрежи, без да каже дали ги чита и неговите објави.
„Таму гледаме дека се води дебата по однос на многу актуелни теми, каде поранешниот претседател на ВМРО-ДПМНЕ е прилично активен, особено на социјалните мрежи. И затоа кажав дека прво треба да усогласат, јас не кажав дека знам каков став има. Но тие треба прво да усогласат на ниво на политичка партија кој е ставот на ВМРО-ДПМНЕ по однос на уставните измени. И повторувам уште еднаш, убеден сум дека во ВМРО-ДПМНЕ има политичари и има луѓе кои што имаат визија и одлучност да поддржат европска интеграција на Северна Македонија во ЕУ, бидејќи тоа е за граѓаните“, кажа Ковачевски.
На прес-конференција во Владата, кога премиерот беше прашан за уставните измени и дали ќе има поддршка од опозицијата, кажа дека Мицкоски и Груевски имаат различни ставови.
„Кога зборуваме за опозицијата, таму треба јасно да се постави прашање кој каков став има. Јас се повеќе гледам дека еден став има актуелниот претседател, а друг став има бившиот претседател на ВМРО – ДПМНЕ. Ќе треба да се видат и ставовите во однос на финалниот став на таа политичка партија“, рече премиерот Димитар Ковачевски во одговор на прашање пред пет дена во Владата.
