Најмалку осум лица загинаа, а 13 се ранети во експлозија што се случи денес во најголемиот затвор во Мјанмар, „Инсеин“, јавија локалните медиуми.
Тројца вработени и пет посетители загинаа во експлозијата што се случи во 9.40 часот по локално време под сè уште неразјаснети околности, објави „Ројтерс“.
Екипите на брзата помош ги префрлиле тешко повредените во локалните болници, а на оние со полесни повреди им била укажана помош на самото место, соопштија надлежните.
Портпаролот на воените власти на Мјанмар не одговори на барањата за коментар на новинарот на „Ројтерс“.
„Инсеин“ е најозлогласениот затвор во земјата и илјадници политички затвореници се испратени во објектот откако војската ја презеде власта во Мјанмар.
