Најмалку 18 лица загинаа, а 23 се повредени во автобуска несреќа во западно Мексико, при превоз на Мексиканци и мигранти на северот на земјата, соопштија властите.
„Вкупниот број на загинати во несреќата е 18, од кои тројца се малолетни и 15 возрасни“, соопшти полицијата во државата Најарит, додавајќи дека несреќата се случила околу 3 часот по полноќ кога автобусот што сообраќал од Мексико за Тихуана паднал во бездната, кај границата со САД.
„Повеќето од патниците беа странци од земји како Индија, Доминиканската Република и од африканскиот континент“, соопштија властите, истакнувајќи дека некои патувале во Тихуана за да се обидат да преминат во САД.
Според пријавата, возачот на автобусот ја надминал дозволената брзина и изгубил контрола над возилото кое паднало во провалија длабока 40 метри покрај патот.
Илјадници мигранти минуваат низ Мексико на пат кон северната граница на земјата за да побараат азил во САД или да се обидат да влезат без виза. Бројни мигранти патуваат илегално, скриени во камиони во нехумани услови. Во декември 2021 година, 50 мигранти загинаа во камионска несреќа во Чиапас, јужно Мексико. Повеќето од нив беа од Централна Америка (Гватемала, Хондурас и Ел Салвадор).
