Здружението за заштита на животните „Анима мунди“ информира дека утрово, жител на Струга, со пушка убил десетици маалски и домашни миленици.
„Бесправна држава, примитивно општество, во кое владеат локални шерифи – резултатот е оваа бруталност на која сведочат денес жителите на градот Струга. Манијак, личност што не може да се нарече човек, охрабрен од нефункционалните институции и распадот на системот во оваа држава, одлучил утрово со пушка да посегне по животот на десетици маалски и домашни миленици. Ладнокрвно ја пролеал нивната невина крв на улиците во Струга“, се наведува во реакцијата од „Анима мунди“.
„И како да не е убиство, како да не е загрозување на јавната безбедност и како да нема закони во оваа држава ниту, пак, институции, една служба, што навидум личи на комунална, ги собира лешовите на невините животни за да ги фрли на депонија, подалеку од сечии очи, со очигледна цел да се прикрие ова грозомозно убиство“, се додава во информацијата.
Од таму со прашање до Министерство за внатрешни работи дали овој случај, еден од стотици досега видени, ќе ја добие правдата?
Дали Агенцијата за храна и ветеринарство, конечно, ќе се разбуди од зимскиот сон и од празничното расположение и ќе ги заштити овие животни, како што впрочем и пропишува законот во нивна надлежност?“
„Апелираме до надлежните институции ВЕДНАШ да ги преземат сите дејства за сторителот да биде пронајден и кривично да одговара за ова масовно убиство! Никој нема за право да одзема нечиј живот, никој нема право со пушка во рацете да пролее невина крв, безмилосно да убие и да помине неказнето“, потенцираат од здружението.
