Амбасадорката на САД во Македонија, Анџела Агелер, порача бизнисменот Јордан Орце Камчев не само што ја нарушува довербата во правосудните органи, туку тој го предава македонскиот народ. На нејзината прва прес-конференција, на која зборува за одлуката Камчев да биде ставен на т.н. „црна листа“ на САД, посочи дека граѓаните заслужуваат институции во кои ќе веруваат. Според неа, САД презеле се што е во нивна надлежност, а останатото е на институциите во Македонија.
„Злоупотребата на службената положба, перењето пари, митото, во кои господинот Камчев бил дел, не само што ја нарушува довербата во правосудните институции, туку претставува и предавство на граѓаните на оваа држава. Граѓаните заслужуваат институции во кои ќе веруваат, кои ги следат демократските вредности, кои се транспарентни и не прават компромиси“, рече Агелер.
Амбасадорката е децидна дека сите корумпирани лица мора да одговараат. Додаде дека САД реагира секогаш кога ќе има докази дека некој правел во коруптивни дејствија.
„Спроведување на законот во оваа држава зависи од институциите на државата. Но корупцијата во било која форма, не смее да биде толерирана“, додаде Агелер.
Порача дека се надева дека граѓаните на Македонија ќе побараат интегритет од тие кои ги раководат институциите.
