Од 31 јануари до 17 февруари, Венеција повторно ќе живее во ритамот на маските, боите и карневалската магија. По темите посветени на Марко Поло и Џакомо Казанова во изминатите години, годинашното издание на еден од најпознатите карневали во светот носи нов фокус – олимпизмот. Инспирацијата доаѓа од фактот што Италија годинава е домаќин на Зимските олимписки игри, кои свечено ќе бидат отворени на 6 февруари во Милано и Кортина. Токму затоа, мотото на карневалот е „Олимп – Во зората на играта“, симболично поврзувајќи ги историјата, уметноста и спортот, како и универзалната вредност на играта и натпреварувачкиот дух. Според организаторите, темата се надоврзува и на митологијата, на хармонијата меѓу телото и духот, но и на духот на старата Венеција. Во минатите векови, карневалите не биле само место за забава, туку и простор за јавни натпревари и колективни вештини – вредности што, на симболичен начин, му претходеле на современиот олимписки идеал.
Овој настан, чии корени датираат уште од 12 век, така добива и историска димензија. Карневалската програма започнува утре напладне со деветтото издание на големиот уличен спектакл – прослава на циркуската уметност, акробации, жонглирање, игри, спортски активности и паради. Настаните ќе се одржуваат на главните плоштади во Венеција, во центарот на Местре, на островите во венециската лагуна, како и во други градови низ регионот Венето. Премиерниот настап ќе биде повторен во недела, 1 февруари, а програмата продолжува на 7 и 8 февруари, потоа на 12 февруари, па секојдневно сè до 17 февруари. Во рамки на уличниот карневал ќе настапат повеќе од 350 уметници и 80 различни трупи, со речиси 1.000 изведби. Организаторите велат дека токму затоа, годинашниот карневал ќе прерасне во вистинска олимпијада на забавата.
