Украина ги доби првите суперсонични повеќенаменски борбени авиони Ф-16 што ги бара со месеци за да се спротивстави на руските ракетни напади, потврди американски претставник за американските медиуми.
Киев со месеци бара од своите западни сојузници авиони Ф-16, тврдејќи дека тие се потребни за соборување на проектилите што се истрелуваат од Русија врз украинска територија.
Авионите Ф-16 се специјализирани за потиснување на противвоздушната одбрана на непријателот. Западот не сакаше да го снабдува Киев со овие авиони, плашејќи се дека вооружувањето на Украина со напредно оружје дополнително ќе ја ескалира војната со Русија.
САД, исто така, обучуваат украински пилоти да летаат со Ф-16. Првата група пилоти успешно ја заврши обуката.
На самитот на НАТО во Вашингтон во јули, украинскиот претседател Володимир Зеленскиј ги притисна сојузниците да ги отстранат сите ограничувања за употребата на оружјето што Киев ги доби од Западот и пред се да и дозволат на Украина да го користи тоа оружје за напади врз поголем број цели во Русија.
Засега не се знае колку авиони Ф-16 пристигнале во Украина во првата транша, ниту пак кои земји ги обезбедиле.
Украинската влада засега не потврди дека ги примила авионите.
Американскиот претседател Џозеф Бајден одобри испраќање американски борбени авиони во Украина во август 2023 година, по неколкумесечниот притисок од Киев и внатрешната дебата во американската администрација, чии претставници стравуваа дека потегот може да ги ескалира тензиите со Русија.
Четири членки на НАТО – Белгија, Данска, Холандија и Норвешка – ветија дека ќе и дадат на Украина повеќе од 60 авиони. Тој број е помал од руската борбена флота, која се проценува дека е околу 10 пати поголема.
