Властите во американската сојузна држава Пенсилванија уапсија осомничен за убиството на четворицата студенти во сојузната држава Ајдахо кои беа избодени со нож пред нешто повеќе од еден месец додека спиеле во изнајмена куќа, изјави денеска полициски претставник.
Ова злосторство го вознемири градот во Ајдахо, каде живеат околу 25.000 луѓе, и каде е седиштето на Универзитетот во Ајдахо. Градот, населен главно со земјоделци, нема убиство во последните пет години.
Околу 11.000 студенти живеат во градот Москва, во Ајдахо, а стравот од повторени напади беше толку голем што речиси половина од студентската популација се исели надвор од градот или се префрли на онлајн часови.
Според полициските документи, осомничениот се вика Кристофер Кохбергер и има 28 години. Кохбергер е во притвор во Пенсилванија и чека екстрадиција до властите за убиствата.
Апсењето беше потврдено за Асошиетед прес од полициски функционер кој побара да остане анонимен бидејќи допрва треба да се објави официјално соопштение.
Четворица студенти од Универзитетот во Ајдахо беа избодени со нож во раните утрински часови на 13 ноември додека лежеа во кревет во изнајмена куќа во близина на кампусот. Тројца биле сместени таму, а четвртиот бил на гости кај девојка. И тој и девојката се убиени.
Обдукцијата покажа дека сите четири жртви најверојатно биле нападнати додека спиеле. Некои од убиените имаа рани што укажува на тоа дека се бранеле, а секој од нив бил избоден повеќепати. Не се пронајдени траги на сексуално насилство.
Осомничениот Кохбергер е уапсен во округот Монро во планините Поконо, во источна Пенсилванија.
