Бројот на жртвите на ураганот Хелен во шест американски држави се искачи на над 160, а милиони луѓе останаа без струја и без пристап до Интернет.
Најтешка ситуација во моментов е во Северна Каролина, каде бројот на загинати е тројно зголемен.
Преживеаните го опишаа хаосот што настана откако ураганот Хелен ја погоди нивната област.
„Видовме тела како висат на дрвјата. Најдовме некои тела под урнатините“, изјавила Алисон Хадсон, чија куќа е целосно уништена.
Спасувачките екипи во западниот дел на Северна Каролина се обидуваат да стигнат до луѓето чија судбина се уште е непозната, три дена откако ураганот Хелен го опустоши југоисточниот дел на САД.
Обилните врнежи предизвикаа поплави во Ешвил. Патиштата беа затворени, има одрони, што уште повеќе ја отежна работата на спасувачките екипи.
Ураганот Хелен го зафати брегот на Флорида во четвртокот вечерта, носејќи неколкудневни врнежи од дожд и уништувајќи домови кои со децении се справуваат со невремето.
Невремето одеше кон север, а цели населени места беа збришани, додека многу заедници останаа без вода и основни потреби.
