Американскиот претседател Доналд Трамп денеска изјави дека палестинската милитантна група Хамас има околу три или четири дена да одговори на неговата понуда за мировен договор во Појасот Газа.
Напуштајќи ја Белата куќа, Трамп им рече на новинарите дека израелските и арапските лидери го прифатиле планот и „ние само чекаме на Хамас“. „Хамас или ќе го стори тоа или нема, а ако не го стори тоа, тоа ќе биде многу тажен крај“, додаде тој.
Кога беше прашан дали има простор за преговори за мировниот план, Трамп рече: „Не многу“.
Белата куќа вчера презентираше мировен план за Појасот Газа, кој предлага крај на конфликтот меѓу Израел и Хамас и враќање на сите заложници во рок од 72 часа од јавното прифаќање на договорот од страна на Израел.
Доколку двете страни се согласат со предлогот, „војната ќе заврши веднаш“, се вели во планот. Израелските сили ќе се повлечат на договорените линии за да се подготват за ослободување на заложниците. Откако ќе бидат ослободени сите заложници, Израел ќе ослободи 250 Палестинци кои отслужуваат доживотни затворски казни во израелските затвори, како и 1.700 жители на Газа кои се притворени од почетокот на конфликтот на 7 октомври 2023 година.
Многу земји низ целиот свет, предводени од арапски и муслимански земји, го поздравија мировниот план вчера.
Египет, Јордан, Саудиска Арабија, Катар, Обединетите Арапски Емирати, Турција, Индонезија и Пакистан во заедничка изјава нагласија дека ја поздравуваат „улогата на американскиот претседател и неговите искрени напори за завршување на војната во Газа“. Тие ја потврдија „својата подготвеност да работат на позитивен и конструктивен начин со САД и засегнатите страни за финализирање на договорот и обезбедување на неговото спроведување“.
