Опозициската СДСМ изрече сериозни квалификации за измените на Законот за полиција, обвинувајќи дека министерот за внатрешни работи, Панче Тошковски, оди по стапките на Никола Груевски и сака партиска полиција под своја контрола.
Според СДСМ, во овие законски измени нема реформи, туку „Тошковски го претвора МВР во параполициски апарат за заштита на криминал и партиски интереси на ВМРО-ДПННЕ. Класичен рецепт за полициска држава“.
Оттаму тврдат дека предлог-законот за полиција којшто Тошковски го предлага е опасен, антиевропски и длабоко корумпиран, со многу скандалозни измени кои потврдуваат дека целта е целосна партизација на полицијата.
„Тошковски ги урива и драстично ги намалува критериумите за образование и искуство за највисоките оперативни позиции во полицијата. Го елиминира кариерниот систем, дури и началник на СВР по рецептот на Тошковски да може да биде било кој што тој ќе одлучи.
Ги укинува регионалните гранични центри, што е директен удар врз контрола на границите. Сака да овозможи бришење на полициски податоци – што е опасен механизам за прикривање на криминал.
Тошковски ги дискриминира младите – со подигање на старосната граница се отвора место само за партиски вработувања во полицијата. Го брише членот што спречува вработување на осудени лица – полицијата станува прибежиште за криминалци. Ова не е ништо друго туку правење партиска милиција под капата на Тошковски“, вели опозициската партија.
СДСМ бара итно повлекување на предлог-законот.
