Претседателот на Светскиот економски форум (СЕФ), Борге Бренде, изрази песимистички поглед на глобалната економија, велејќи дека светот ќе се соочи со деценија низок раст доколку не се спроведат вистинските економски мерки.
Говорејќи на „Специјалниот состанок на СЕФ за глобална соработка, раст и енергија за развој“ во Ријад во неделата, тој предупреди дека стапките на глобалниот долг се блиску до нивоата што не се забележани од 1820-тите и дека постои ризик од „стагфлација“ во напредните економии.
„Глобалниот раст годинава ќе биде околу 3,2 отсто. Не е лошо, но не е она на што сме навикнати – трендот на раст е четири проценти со децении“, изјави тој за Си-Ен-Ен, додавајќи дека постои ризик од забавување како она што беше забележано во 1970-тите во некои големи економии.
Бренде, одговарајќи на прашање за избегнување период на низок раст, рече дека „не можеме да влеземе во трговска војна“, но дека сепак треба да тргуваме меѓу себе.
„Трговијата ќе се промени. Треба да се справиме со ситуацијата со глобалниот долг. Не сме виделе ваков долг од Наполеонските војни, се приближуваме до 100 отсто од глобалниот БДП“, рече тој.
Претседателот на СЕФ рече дека владите треба да размислат како да го намалат тој долг и да ги преземат вистинските фискални мерки, без да дојдат во ситуација да започне рецесија. Тој, исто така, посочи на постојаните инфлациски притисоци и дека генеративната вештачка интелигенција може да биде можност за светот во развој.
Неговото предупредување се совпаѓа со неодамнешниот извештај на Меѓународниот монетарен фонд (ММФ), во кој се вели дека глобалниот јавен долг достигна 93 отсто од БДП минатата година и останува девет процентни поени повисок од нивото пред пандемијата.
ММФ предвиде дека глобалниот јавен долг би можел да биде близу 100 отсто од БДП до крајот на деценијата.
Фондот, исто така, ги издвои високите нивоа на долг во Кина и САД, велејќи дека лабавата фискална политика во нив врши притисок врз каматните стапки и доларот, што потоа ги зголемува трошоците за финансирање ширум светот – влошувајќи ги веќе постоечките слабости.
