Светската програма за храна (WFP) од следниот месец ќе ја прекине помошта во храна за повеќе од 200.000 Палестинци поради големиот недостиг на финансии, изјави во неделата висок претставник на групата задолжен за палестинските региони.
„Со оглед на сериозниот недостиг на финансиски средства, WFP е принудена да донесува болни одлуки за да ги ослободи ограничените финансиски ресурси“, телефонски изјави од Ерусалим Самер Абделџабер, директор на WFP за палестинските територии, за Ројтерс.
Најпогодени ќе бидат семејствата кои живеат во Појасот Газа, каде што се најголеми проблемите со сиромаштијата и недостигот на храна, како и областите на Западниот Брег.
Агенцијата на ОН на сиромашните Палестинци им нуди месечни ваучери во вредност од 10,30 долари по лице и кутии со храна.
Во Газа, со која од 2007 година владее исламистичката група Хамас, живеат 2,3 милиони луѓе, од кои 45 отсто се невработени, а 80 отсто зависат од меѓународна помош. Податоците се од регистрите на ОН.
Оправдувајќи ги своите потези со загриженост за безбедноста поради владејачкиот Хамас, Израел, заедно со Египет, доведе до блокада на областа, ограничувајќи го со години движењето на луѓе и стоки.
