Добро е познато дека кучињата се најдобриот пријател на човекот, но една нова студија покажува дека тие се особено корисни за жените.
Истражувачите откриле дека времето поминато со кучиња може да го забави стареењето на клеточно ниво. Дури и еден час неделно поминат со кучиња може да има позитивен ефект врз здравјето на жените , пишува Дејли Меил.
Научниците тврдат дека кучињата би можеле да бидат едноставна и достапна форма на терапија за жените, бидејќи помагаат во намалувањето на негативното влијание на стресот и го подобруваат клеточното здравје, објавува Index.hr.
Сè уште не е познато дали имаат ист ефект врз мажите, но ова би можело да се испита во идните студии.
Кучињата како форма на терапија
Авторката на студијата, д-р Шерил Краузе-Парело, вонреден професор по нега на Универзитетот Флорида Атлантик, објасни дека животните имаат позитивен ефект врз менталното и физичкото здравје на жените.
„Нетрадиционалните пристапи, како што е поврзувањето со животни, можат да обезбедат значителна поддршка. Овие врски нудат емоционална сигурност и стабилност, што е особено корисно за жените“, рече таа.
