Генералниот секретар на НАТО Јенс Столтенберг денеска им се обрати на делегатите на 18-та годишна Конференција на НАТО за контрола на вооружувањето, разоружувањето и неширење на оружјето за масовно уништување и посочи дека човештвото влезе во период на огромни безбедносни предизвици.
„Официјален Кремљ одлучи да ја укине контролата на оружјето и да ја поткопа стратешката стабилност со суспендирање на учеството во Новиот договор СТАРТ, непочитувајќи го Договорот за нуклеарни сили од среден дострел (ИНФ) со се поизразена провокативна нуклеарна реторика и закани за распоредување тактичко нуклеарно оружје во Белорусија. Ова се неодговорни дејствија, дизајнирани да ги одвратат сојузниците од НАТО да ја поддржат Украина, но неуспешни“, рече Сртолтенберг.
Според него, се очекува Кина да има околу 1.500 нуклеарни боеви глави до 2035 година.
„Долгорочно, мораме да го преиспитаме и да го прилагодиме нашиот пристап кон поопасен и попредизвикувачки свет. Како глобална сила, Кина има глобални одговорности. Пекинг, исто така, би имал корист од зголемената транспарентност, предвидливост и безбедност на договорот за контрола на оружјето“, изјави Столтенберг.
Тој рече дека НАТО е платформа за соработка со Кина и пошироката меѓународна заедница за заедничка корист.
Според неговите зборови, од една страна се заканува колапс на меѓународниот поредок за контрола на оружјето и неограниченото ширење на оружјето за масовно уништување со длабоко опасни последици, а од друга страна, постои алтернативен пат. Тој, исто така, рече дека безбедносното опкружување можеби се променило, но „принципите за одржување на безбедноста не се промениле“.
