Предметот против Финансиската полиција и разрешениот директор Арафат Муареми ќе го води обвинителката Лиле Стефанова, информираа од Обвинителство.
Предметот и е предаден на Стефанова, која е дел од полициското одделение на Обвинителството за гонење организиран криминал. Според извештајот од Републичкото обвинителство, токму ова одделение е надлежно за постапување.
Вториот предмет со чија предистрага се испитува зошто Министерството за внатрешни работи и министерот Оливер Спасовски со месеци го чувале во фиока решението за привремена забрана за работа на станицата за технички преглед „Виа комерц“, во која на последна контрола бил и автобусот на „Беса транс“ што изгоре во Бугарија, го доби обвинителката Катерина Коларевиќ. Таа веќе постапува по предметот кој се води против ексгенералниот секретар на Влада, Мухамед Зеќири.
„Постапувањето по овие предмети ќе продолжи непречено и јавните обвинители на кои сега им се доверени ќе ги преземат сите дејствија во согласност со Законот за кривична постапка за да ги проверат наводите во поднесените кривични пријави“, информираа од Обвинителството.
Овие два предмети ги водеше суспендираната обвинителка Вилма Русковска. Таа пред две недели, кога поднесуваше жалба до Советот на јавни обвинители, потенцираше дека ќе се сомнева во постапувањето по овие предмети, без разлика кој обвинител ќе ги наследи, со оглед дека таа е суспендирана поради воедењето на едниот од нив.
