Британскиот премиер Кир Стармер за време на посетата на Пекинг обезбеди договор за безвизно патување во Кина за државјаните на Обединетото Кралство, соопшти Даунинг стрит.
Според договорот, лицата што ќе престојуваат во Кина помалку од 30 дена повеќе нема да имаат потреба од виза. Мерката ќе важи за деловни патувања и туризам и ги изедначува правилата за британските посетители со оние за граѓаните на 50-ина други земји, меѓу кои Франција и Германија.
Промената нема да стапи во сила веднаш, но се наведува дека Пекинг се обврзал еднострано да воведе безвизен режим за британските државјани, при што датумот на почеток дополнително ќе биде утврден.
Во моментот носителите на британски пасош мораат да имаат виза за влез во континентална Кина.
– Како една од светските економски сили, бизнисите одамна бараат начини да го прошират своето присуство во Кина. Ќе им го олесниме тоа, меѓу другото, и со пофлексибилни визи за краткорочни патувања, со што ќе се поддржи нивното меѓународно проширување, а во исто време ќе се поттикне растот и работните места дома – изјави Стармер.
Договорот следува по клучната средба со кинескиот претседател Шји Џјинпинг во рамките на напорите на Стармер за „ресетирање“ на односите меѓу двете земји.
Стармер се сретна со Шји во Големата сала на народот, прва посета на британски премиер на Кина од 2018 година. На почетокот на разговорите тој истакна дека сака „позрел и пософистициран“ однос со Пекинг, а Шји оцени дека односите во последните години минале низ „одредени подеми и падови“.
Британскиот премиер пристигна во Кина со делегација од 54 претставници на британски компании и културни институции, со цел продлабочување на врските со земјата.
За време на разговорите, Стармер отворил и „прашања од загриженост“, соопшти Даунинг стрит. Тој беше повикан да го поведе случајот со затворениот продемократски активист од Хонг Конг, Џими Лаи, како и третманот на ујгурското малцинство.
– Имавме почитувана дискусија за тие прашања и тоа е составен дел од причините за ангажман – рече Стармер додавајќи дека биле иницирани и теми по кои двете страни не се согласуваат.
Пекинг соопшти дека лидерите се согласиле да развиваат „долгорочно, стабилно и сеопфатно стратешко партнерство“. Во кинеското соопштение се наведува дека Кина нема да „претставува закана“ за други земји, како и дека британската политика кон Тајван „останува непроменета“.
По средбата, Стармер ја посети Забранетата палата, а потоа присуствуваше на свечен пречек во Големата сала на народот пред разговорите со кинескиот премиер Ли Чијанг, при што воен оркестар ги интонира химните на двете земји.
