Голем број членови на највисокото раководство на Сојузот на синдикати на Македонија (ССМ), придружувани од работниците, денеска во 12:05 часот на улица ја отворија првата јавна седница. На нога, претседателот на ССМ, Слободан Трендафилов, го прочита дневниот ред со три точки, кој беше едногласно прифатен. Седницата започна со едноминутен молк во чест на жртвите од трагедијата во Кочани.
„Имајќи предвид дека првата јавна седница на ССМ се одржува во исклучително тажни услови, со едноминутно молчење да оддадеме почит на трагично загинатите луѓе во Кочани. Слава им. Брзо закрепнување на сите повредени,“ истакна Трендафилов.
Првата точка на дневниот ред беше јасната порака дека „не може да има за пратениците, а да нема за работниците.“ Втората точка предупредува дека „подадената рака на работникот денес може да стане стисната тупаница утре.“ Третата точка е најважната порака кон Владата – дека не може да се одлучува за работниците без работниците!
ССМ останува цврсто на барањето минималната плата да биде 500 евра, за што веќе испратија предлози до Собранието и Владата.
Работниците заслужуваат достоинство и правични плати!
