Мандатарот за нова влада и претседател на ВМРО-ДПМНЕ, Христијан Мицкоски денеска најави дека составот на неговата влада ќе биде доставен во Собранието во вторник, на 18 јуни.
Претходно в недела, ВМРО-ДПМНЕ на Извршен и Централен комитет ќе ги потврди имињата на новите министри и заменици министри во Владата.
Мицкоски кажа дека во новата влада ќе учествуваат ВМРО-ДПМНЕ, Вреди и ЗНАМ, додека во опозиција ќе бидат коалицијата на СДСМ, коалицијата на ДУИ и партијата Левица.
„Јас не би зборувал во името на другите политички партии и во името на нашите коалициони партнери, тие тоа што имаат да го кажат, ќе си го кажат самите. Што се однесува за коалицијата „Твоја Македонија “ и ВМРО-ДПМНЕ, ние сме структура која има организациска поставеност, вертикална, функционира врз основа на статут и нормално, во согласност со законите и Уставот. Овој викенд, во недела ќе биде одржана седница на Извршниот и Централниот комитет, ќе бидат претставени кадровските решенија од моја страна како мандатар, со нивната биографија. Очекувам ИК и ЦК да се произнесат, а ако произнесување е позитивно и успешно, да бидат соопштени на јавноста. Официјалниот список на идната Влада, заедно со програмата на работа, на 18 јуни, во вторник, ќе бидат доставени до Собранието“, кажа Мицкоски.
