Скопскиот кривичен суд изрече условна затворска казна за Александар Николчев и Маја Караманова, лицата кои на 9 јули ја нападнаа новинарската екипа на телевизијата Алсат. Инцидентот се случи за време на големиот пожар на дивата депонија во скопско Визбегово, додека новинарите беа на терен и известуваа за сериозното загадување на воздухот.
Двајцата обвинети ја признаа вината и се согласија со сите обвинувања и правни квалификации изнесени од страна на Обвинителството, објави порталот 4NEWS.mk.
Судот ги прогласи за виновни и им изрече условна затворска казна: три години условно за Александар Николчев и една година и три месеци условно за Маја Караманова. Според пресудата, доколку не ги почитуваат условите на казната, таа ќе биде спроведена како ефективен затвор.
Инцидентот предизвика остри реакции во јавноста и меѓу новинарските здруженија, кои побараа посериозна заштита за новинарите кои известуваат од терен, особено во ситуации со зголемен ризик.
