Пишува: Проф. д-р. Јове Кекеновски
Случајот со судијата Енвер Беџети претставува жив доказ за длабоко вкоренетата корупција и заробеноста на македонскиот правосуден систем. Иако САД го ставија на „црната листа“ поради сериозни индиции за корупција и трговија со влијание, домашните институции со месеци одолговлекуваат и симулираат активности, без да преземат реални мерки за негова кривична и материјална одговорност.
Овој случај не е само за индивидуално однесување. Тој открива постоење на долготрајна, организирана мрежа за заштита внатре во институциите, особено во Судскиот совет и Обвинителството, каде одредени лица, често политички блиски, со години го штителе Беџети од било каква одговорност.
Познато е дека Беџети со месеци, па дури и со години, ги чувал предметите во фиока, клучни случаи како „Таргет-Тврдина“ и „Транспортер“, со што овозможил истите да застарат. Тоа не е случајност, туку свесна саботажа на правдата. И покрај медиумските и јавни притисоци, надлежните институции не реагираа соодветно што јасно укажува на договорена заштита.
Најилустративен е примерот од јануари 2023, кога комисијата на Судскиот совет утврди дека Беџети намерно го чувал во фиока предметот за Сашо Мијалков. Наместо итно разрешување и кривична постапка, тој беше казнет само со 20% од платата. Тоа не е санкција, тоа е исмејување на јавноста и плукање врз правдата.
Беџети не може и не смее да биде третиран како изолиран случај. Потребна е целосна одговорност за сите кои го штителе вклучувајќи го членот на Судскиот совет С.А., и сите оние кои учествувале во блокирањето на неговото разрешување и одговорност. Системот мора да се исчисти од политички поставени, недостојни и неспособни судии.
Овој случај отвора многу пошироки прашања и тоа не само правни, туку и политички и етички. Тој ја покажува неодговорноста на институциите, многу ниско ниво на стручност и морал кај дел од судиите и обвинителите, како и постоењето на мрежи кои системски штитат корумпирани функционери.
Доста беше глумење правда. Време е за итна и вистинска кривична и материјална одговорност.
