Македонија и во текот на наредната работна седмица ќе остане под влијание на топол воздушен бран од југ, односно од Африка, но овој пат со нешто поумерен интензитет, информираат метеоролозите.
Во периодот од понеделник до петок продолжува сушниот и стабилен период, со претежно сончево и топло време, повремено со појава на мала до умерена локална облачност. Повремено ќе дува засилен ветер од северен и североисточен правец.
Минимални услови за слаб и краткотраен локален дожд се очекуваат само во вторник.
Температурите ќе се движат во интервал од 31 до 38 степени, а во Скопје се очекува максималната дневна температура да достигне до 37, односно 38 степени.
Утринските температури на почетокот на седмицата ќе се спуштаат меѓу 12 и 19 степени, но потоа ќе бидат во постепен пораст и ќе се движат од 15 до 22 степени.
УВ индексот ќе биде висок до многу висок, со вредности помеѓу 8 и 9.
