Во драматична атмосфера на денешната седница на Комисијата за политички систем и односи меѓу заедниците, каде единствена точка на дневен ред беше Предлог на закон за изменување и дополнување на Законот за организација и работа на органите на државната управа, по скратена постапка, се случи инцидент.
Претседателот на комисијата Љупчо Пренџов, пратеник од ВМРО-ДПМНЕ, се обиде грубо да го прекине и да му го ограничи времето на зборување на пратеникот од СДСМ Фатмир Битиќи, иако тој се обиде да го продолжи своето излагање. Овој чин е во директна спротивност со Деловникот на Собранието на Република Северна Македонија, кој гарантира слобода на говор и правото на пратениците да го искажат своето мислење.
Пратеничката од СДСМ, Славјанка Петровска побара објаснување по кој член од Деловникот се ограничува времето на говорење на комисиски расправи, на што претседавачот Пренџов не даде одговор и објаснување.
„Ограничувањето на слободата на говор на пратениците од опозицијата претставува сериозен удар врз демократијата и принципите на парламентарниот плурализам. ВМРО-ДПМНЕ уште не дојдени на власт се обидуваат да ја замолчат опозицијата“, вели Битиќи за инцидентот.
