Сојузот на синдикатите на Македонија на Денот на трудот – 1 Мај организира првомајски протест под мотото „Работниците се државата“.
Протестот ќе почне во 12 часот пред зградата на ССМ.
„Сметаме дека покачувањето на функционерските плати за 78 проценти или по 2.000 денари дневно, воведувањето на 12 часовен работен ден за голем број работници, тоа што ги излажаа вработените во здравството и што не им ги зголемија платите, тоа што не го склучија општиот колективен договор за јавен сектор со кој секој вработен ќе има право на К-15, се доволен мотив и повеќе од причина да се излезе на протест на улица и да се изрази незадоволството“, порачува ССМ во повикот за учество на протестот.
Сите заедно, работници, синдикати, граѓани и синдикалци, дополнуваат од Синдикатот, треба да застанеме и да покажеме единство и солидарност и да ги спречиме намерите и лошите владини политики.
Според ССМ, првомајскиот протест е единствен начин власта да го слушне гласот на сите.
