Земјотрес со јачина од 5 степени според Рихтеровата скала се случи утринава во 10:40 часот по локално време, на околу 18 километри источно-југоисточно од Палеохори во Ханија, Крит, се вели во соопштението на ЕЛМЕПА, Институтот за физика на Земјата со седиште во Ханија.
Земјотресот бил на длабочина од 10 километри, се наведува во соопштението на ЕЛМЕПА, а пренесува грчката телевизија ЕРТ.
Почувствуван во Палеохори, Суга и Сфакија, но засега нема информации за материјална штета.
Претходно утрово на истото подрачје беше регистриран послаб земјотрес со јачина од 3,4 степени според Рихтеровата скала.
Според податоците на ЕЛМЕПА, земјотресот е регистриран на 41 километар јужно од Палеохори, а епицентарот бил на длабочина од околу 25,8 километри.
„Беше силно и траеше околу 30 секунди“, „Моето столче за плажа се помести“, „Бев надвор кога се случи, мислев дека е гром“, се дел од коментарите на луѓето кои го почувствувале земјотресот.
