Лицата што се нашле на црната листа на САД не треба да продолжат со редовни активности, смета претседателката Гордана Силјановска-Давкова откако на црната листа на САД осамнаа имињата на поранешниот прв вицепремиер Артан Груби и на судијата Енвер Беџети. Тие се означени дека биле вклучени во значителна корупција со прифаќање мито за нарушување на судските процеси поврзани со кривичното осудување на Сашо Мијалков, поранешниот директор на УБК, соопшти Стејт департментот.
Силјановска-Давкова смета дека ако јавните обвинители постапуваат по допрен глас, тогаш треба да постапуваат и по случајот со црната листа бидејќи со тоа САД испратиле јасна порака, а во случајот тоа е поткрепено со факти и докази.
„Во меѓународното право и во меѓусебните односи постојат начини да се дојде до тие докази и да се почне постапка тука бидејќи во спротивно ние не рагираме кога мора да реагираме и со тоа го толелираме беззаконието. Очекувам судот, т.е. јавниот обвинител да почне да постапува“, изјави Давкова.
Претседателката дополнително како загрижувачки момент го истакна и тоа што на листата на САД се најде и името на судија од Македонија бидејќи, како што рече, судот треба да биде синоним за почитување на правото и правдата.
„Чинам дека неправдата и владеењето на присилни луѓе ги направиле сите институции слаби и во тој случај потребни се во духот на оценската мисија итни чекори и реформи во сите органи“, рече Давкова додавајќи дека треба да се размисли дали во текот на годините е креиран партизиран судски систем.
Според неа, треба да се тргне не само од конкретниот случај, туку да се види и како сите во судскиот систем се нашле на определени позиции. Давкова вели дека најголемиот дел од вината лежи во двата најважни органа – Судскиот совет и Советот на јавните обвинители, кои треба да бидат чуварот и филтерот на независноста на судството.
Во врска со одлучувањето на Уставниот суд за Законот на јазиците, претседателката рече дека нивните одлуки се конечни и лидерите на партиите и политичарите треба да се воздржат од коментари. Најмалку што може да сторат е да го остават Уставниот суд да си работи во согласност со Уставот и Деловникот, заклучи Давкова.
