Кинескиот претседател Си Џинпинг денеска го пофали словачкиот премиер Роберт Фицо за „одржувањето на пријателството“ со Кина и изрази надеж дека Братислава ќе продолжи да го поддржува Пекинг во градењето на односите со Европската Унија.
За време на средбата со Фицо, Си нагласи дека меѓународната заедница сега повеќе од кога било има потреба од единство и соработка.
Средбата се одржа еден ден откако Фицо присуствуваше на големата воена парада во Пекинг, кој ја демонстрираше воената моќ и дипломатското влијание на Кина.
Кина се потпира на одредени земји од ЕУ, вклучително и Словачка, да застапуваат нејзини интереси пред Унијата, особено по воведувањето високи царини на кинеските електрични возила поради обвинувања за нелојална конкуренција. Словачка е меѓу петте земји-членки на ЕУ што се спротивставија на овие царини.
Си изјави дека очекува Словачка да продолжи да игра „позитивна улога“ во унапредувањето на односите меѓу Кина и ЕУ – објави кинеската државна агенција „Синхуа“.
Фицо, кој последен пат се сретна со Си во Москва во мај, покажува силна желба за брз развој на односите со Пекинг. Заедно со Унгарија, владата на Словачка се стреми да привлече кинески инвестиции што создаваат работни места за компаниите што продаваат производи во Европа. За разлика од Унгарија, каде околу 31% од кинеските инвестиции во Европа се насочени, според унгарскиот министер за надворешни работи Петер Сијарто, Словачка сè уште бавно ги развива економските врски со Кина, достигнувајќи стратешко ниво на соработка дури минатата година.
Словачка, слично на Унгарија, одржува блиски односи и со Русија, која обезбедува значителен дел од нејзините енергетски потреби.
Утре Фицо ќе се сретне со украинскиот претседател Володимир Зеленски, откако во вторникот изјави пред рускиот претседател Владимир Путин дека сака нормализација на односите со Кремљ. Ова доаѓа во време кога ЕУ се обидува да се ослободи од зависноста од руските енергетски ресурси поради инвазијата во Украина во 2022 година.
